ਉਡਾਣ ਭਰਦੇ ਹੀ ਰਣਵੇਅ 'ਤੇ ਡਿੱਗਿਆ SpiceJet ਜਹਾਜ਼ ਦਾ ਪਹੀਆ, ਕਰਵਾਉਣੀ ਪਈ ਐਮਰਜੈਂਸੀ ਲੈਡਿੰਗ

ਗੁਜਰਾਤ ਦੇ ਕਾਂਡਲਾ ਤੋਂ ਮੁੰਬਈ ਆ ਰਹੇ ਸਪਾਈਸਜੈੱਟ ਦੇ Q400 ਜਹਾਜ਼ ਦਾ ਬਾਹਰੀ ਪਹੀਆ ਉਡਾਣ ਭਰਨ ਤੋਂ ਤੁਰੰਤ ਬਾਅਦ ਰਨਵੇਅ 'ਤੇ ਡਿੱਗ ਗਿਆ। ਮੁੰਬਈ ਵਿੱਚ ਲੈਂਡਿੰਗ ਕਰਦੇ ਸਮੇਂ, ਪਾਇਲਟ ਨੇ ਐਮਰਜੈਂਸੀ ਘੋਸ਼ਿਤ ਕੀਤੀ, ਹਾਲਾਂਕਿ ਜਹਾਜ਼ ਸੁਰੱਖਿਅਤ ਉਤਰ ਗਿਆ। ਸਪਾਈਸਜੈੱਟ ਦਾ ਬੰਬਾਰਡੀਅਰ DHC8-400 ਜਹਾਜ਼, ਜਿਸ ਦਾ ਫਲਾਈਟ ਨੰਬਰ SG-2906 ਸੀ, ਨੇ ਸ਼ੁੱਕਰਵਾਰ ਦੁਪਹਿਰ 2.39 ਵਜੇ ਕਾਂਡਲਾ ਹਵਾਈ ਅੱਡੇ ਦੇ ਰਨਵੇਅ ਨੰਬਰ 23 ਤੋਂ ਉਡਾਣ ਭਰੀ। ਉਡਾਣ ਭਰਨ ਤੋਂ ਤੁਰੰਤ ਬਾਅਦ, ਟਾਵਰ ਕੰਟਰੋਲਰ ਨੇ ਰਨਵੇਅ 'ਤੇ ਜਹਾਜ਼ ਤੋਂ ਇੱਕ ਵੱਡੀ ਕਾਲੀ ਚੀਜ਼ ਡਿੱਗਦੀ ਦੇਖੀ। ਜਦੋਂ ਨਿਰੀਖਣ ਟੀਮ ਨੇ ਜਾ ਕੇ ਦੇਖਿਆ ਤਾਂ ਜਹਾਜ਼ ਦਾ ਪਹੀਆ ਡਿੱਗ ਗਿਆ ਸੀ।

ਤਕਨੀਕੀ ਖਰਾਬੀ ਦੀ ਸੂਚਨਾ ਮਿਲਣ ਤੋਂ ਬਾਅਦ ਮੁੰਬਈ ਦੇ ਛਤਰਪਤੀ ਸ਼ਿਵਾਜੀ ਮਹਾਰਾਜ ਅੰਤਰਰਾਸ਼ਟਰੀ ਹਵਾਈ ਅੱਡੇ (CSMIA) 'ਤੇ ਦੁਪਹਿਰ 15:51 ਵਜੇ ਉਡਾਣ ਦੀ ਐਮਰਜੈਂਸੀ ਲੈਂਡਿੰਗ ਕੀਤੀ ਗਈ। ਹਵਾਈ ਅੱਡਾ ਪ੍ਰਸ਼ਾਸਨ ਨੇ ਸਾਵਧਾਨੀ ਵਜੋਂ ਪੂਰੀ ਐਮਰਜੈਂਸੀ ਘੋਸ਼ਿਤ ਕੀਤੀ ਸੀ। ਹਾਲਾਂਕਿ, ਜਹਾਜ਼ ਰਨਵੇਅ ਨੰਬਰ 27 'ਤੇ ਸੁਰੱਖਿਅਤ ਉਤਰ ਗਿਆ। ਜਹਾਜ਼ ਵਿੱਚ ਚਾਲਕ ਦਲ ਸਮੇਤ ਲਗਭਗ 78 ਯਾਤਰੀ ਸਵਾਰ ਸਨ। ਉਹ ਸਾਰੇ ਸੁਰੱਖਿਅਤ ਹਨ। ਲੈਂਡਿੰਗ ਤੋਂ ਬਾਅਦ, ਹਵਾਈ ਅੱਡੇ 'ਤੇ ਆਮ ਕੰਮਕਾਜ ਬਹਾਲ ਕਰ ਦਿੱਤਾ ਗਿਆ। ਬੰਬਾਰਡੀਅਰ DHC8-400 ਵਿੱਚ ਇੱਕ ਟ੍ਰਾਈਸਾਈਕਲ ਲੈਂਡਿੰਗ ਗੀਅਰ ਸਿਸਟਮ ਹੈ, ਜਿਸ ਦੇ ਨੋਜ਼ ਗੀਅਰ 'ਤੇ ਦੋ ਪਹੀਏ ਹਨ ਅਤੇ ਹਰੇਕ ਮੁੱਖ ਲੈਂਡਿੰਗ ਗੀਅਰ 'ਤੇ ਦੋ ਮੁੱਖ ਪਹੀਏ ਹਨ।