Triple Murder ਨੇ ਫੈਲਾਈ ਦਹਿਸ਼ਤ, ਇੱਕੋ ਘਰ ਵਿੱਚੋਂ ਮਿਲੀਆਂ 3 ਲਾਸ਼ਾਂ

ਰਾਜਧਾਨੀ ਦਿੱਲੀ ਤੋਂ ਇੱਕ ਸਨਸਨੀਖੇਜ਼ ਮਾਮਲਾ ਸਾਹਮਣੇ ਆਇਆ ਹੈ। ਦੱਖਣੀ ਦਿੱਲੀ ਦੇ ਸੱਤਬਾੜੀ ਖੜਕ ਪਿੰਡ ਦੇ ਮੈਦਾਨ ਗੜ੍ਹੀ ਇਲਾਕੇ ਵਿੱਚ ਇਕ ਘਰ ਵਿੱਚੋਂ ਤਿੰਨ ਲਾਸ਼ਾਂ ਬਰਾਮਦ ਹੋਈਆਂ ਹਨ। ਇਸ ਵਿੱਚ ਇੱਕ ਔਰਤ ਅਤੇ ਦੋ ਮਰਦਾਂ ਦੀਆਂ ਲਾਸ਼ਾਂ ਸ਼ਾਮਲ ਹਨ। ਪੁੱਤਰ 'ਤੇ ਕਤਲ ਦਾ ਦੋਸ਼ ਲਗਾਇਆ ਜਾ ਰਿਹਾ ਹੈ। ਸੂਚਨਾ ਮਿਲਦੇ ਹੀ ਪੁਲਸ ਮੌਕੇ 'ਤੇ ਪਹੁੰਚ ਗਈ ਅਤੇ ਜਾਂਚ ਸ਼ੁਰੂ ਕਰ ਦਿੱਤੀ।

ਮੌਕੇ 'ਤੇ ਸਥਿਤੀ

ਜਦੋਂ ਪੁਲਸ ਮੌਕੇ 'ਤੇ ਪਹੁੰਚੀ, ਤਾਂ ਘਰ ਦੀ ਹੇਠਲੀ ਮੰਜ਼ਿਲ 'ਤੇ ਖੂਨ ਨਾਲ ਲੱਥਪੱਥ ਦੋ ਲਾਸ਼ਾਂ ਮਿਲੀਆਂ ਅਤੇ ਪਹਿਲੀ ਮੰਜ਼ਿਲ 'ਤੇ ਇੱਕ ਔਰਤ ਦੀ ਲਾਸ਼ ਮਿਲੀ।ਮ੍ਰਿਤਕਾਂ ਦੀ ਪਛਾਣ ਪ੍ਰੇਮ ਸਿੰਘ (45-50), ਰਜਨੀ (40-45) ਅਤੇ ਰਿਤਿਕ (24) ਵਜੋਂ ਹੋਈ ਹੈ।

ਪੁੱਤਰ 'ਤੇ ਕਤਲ ਦਾ ਦੋਸ਼

ਮ੍ਰਿਤਕ ਜੋੜੇ ਦਾ ਪੁੱਤਰ ਸਿਧਾਰਥ, ਜਿਸ ਦੀ ਉਮਰ 22-23 ਸਾਲ ਦੱਸੀ ਜਾਂਦੀ ਹੈ, ਘਰੋਂ ਲਾਪਤਾ ਹੈ। ਸਥਾਨਕ ਜਾਂਚ ਤੋਂ ਪਤਾ ਲੱਗਾ ਹੈ ਕਿ ਸਿਧਾਰਥ ਦਾ ਮਾਨਸਿਕ ਇਲਾਜ ਚੱਲ ਰਿਹਾ ਸੀ। ਮੁੱਢਲੀ ਜਾਣਕਾਰੀ ਅਨੁਸਾਰ, ਉਸ ਨੇ ਕਿਸੇ ਨੂੰ ਦੱਸਿਆ ਸੀ ਕਿ ਉਸ ਨੇ ਆਪਣੇ ਪਰਿਵਾਰ ਨੂੰ ਮਾਰ ਦਿੱਤਾ ਹੈ। ਇਲਾਕੇ ਦੇ ਲੋਕ ਸਦਮੇ ਵਿੱਚ ਹਨ। ਹਰ ਕੋਈ ਪੁੱਛ ਰਿਹਾ ਹੈ ਕਿ ਅਜਿਹਾ ਕੀ ਹੋਇਆ ਕਿ ਪੁੱਤਰ ਨੇ ਆਪਣੇ ਹੀ ਮਾਤਾ-ਪਿਤਾ ਅਤੇ ਭਰਾ ਨੂੰ ਮਾਰ ਦਿੱਤਾ। ਕੋਈ ਵੀ ਵਿਸ਼ਵਾਸ ਨਹੀਂ ਕਰ ਪਾ ਰਿਹਾ ਕਿ ਉਹੀ ਸਿਧਾਰਥ ਜਿਸਨੂੰ ਉਹ ਹਰ ਰੋਜ਼ ਆਉਂਦੇ-ਜਾਂਦੇ ਦੇਖਦੇ ਸਨ, ਇੰਨਾ ਭਿਆਨਕ ਕਦਮ ਚੁੱਕ ਸਕਦਾ ਹੈ।